O volume Epistolaridad y realismo , publicado recentemente pola USC dentro do selo de calidade USC Editora, foi o segundo libro máis vendido do catálogo presentado polas editoriais universitarias españolas durante a Feira do Libro de Madrid. A obra, da profesora de orixe galega da Universidade de Pennsylvania Olga Guadalupe Mella, recolle a correspondencia privada e literaria de Juan Valera, Emilia Pardo Bazán e Benito Pérez Galdós.
No seu conxunto as editoriais universitarias españolas aumentaron as súas vendas un 49% con respecto ás realizadas en 2015 nesta Feira. As cifras, en opinión da Unión de Editoriais Universitarias Españolas, están directamente relacionadas coa maior oferta nunca presentada pola UNE, o cada vez maior coñecemento que o público xeral ten do libro científico universitario e coa programación de actividades, como a sinatura de exemplares, organizadas na caseta e que atraeron os lectores interesados.